ДОС ТУРАЛЫ СӨЗ

Тіршілік — сағым. Жақында абзал досымыз - Арман Жуасбаев, келместін кемесіне мініп, бақилық болды.

Төтенше келген қаза бәріміздің де жанымызды жаралап кетті. «Қош!» деуге көңіл қимайды, «қош» демеске амал жоқ. Осындайда жақсы досты еске алып, қолдан келсе жастарға үлгі тұту  жан дауасындай, достық асыл парызындай екен.

Осы абзал жанның қадірі мен қасиеті неде дегенде, Арманның  қос жанарынан нұрлана төгілген ерекше мейірім шапағынан, байтақ даламның өзі тербегендей әсер алатын кездер еске түседі.

Арман жүрегі кең, алды ашық, жайсаң мінезді азамат еді. Білімді заңгер, білікті маман болды. Оған куә көптеген жылдар бойы құқық қорғау органдарындары, Президенттің Іс басқармасы, Парламент апараттарында атқарған еңбегі. Сонымен қатар саламатты өмір жолымен жүріп, спортқа да жақын болды. Әсіресе футбол десе ішкен асын жерге қоятын.

Бірнеше жыл бойы Президенттің Іс басқармасы, Парламент  футбол командаларының құрамында ойнап, өз шеберлігімен  бәрімізді таңдай қақтырды. Өзіне ғана тән дриблингімен, ойын өрнегін ерекше құрастыруымен әуесқой футболшылар арасында даралана білді.

Бақилық болған азаматтың ендігі өмірі - өрендерінің, туған-туыс, дос-жарандарының жүрегінде, көптеген  әріптестерінің жадында, атқарған істерінде.

Кеткені кеше болсада,  жан жылуы мол жүрегінен шығатын  жылытар сөздері мен футбол аланыңда найзағайдай жарқылдаған ойын өрнегін сағындық.

Арман досымыз арамызда болмаса да, біздің жүрегімізде ешқашан  сөнбейтін шұғыла.

Достық пен адалдықтың үлгісіндей ғұмыр кешкен Арманның  жаны жәннатта болсын

М.Т.Оспанов атындағы қоғамдық қорының футбол командысы атынан

Сатыбалды ДӘУЛЕТАЛИН

• < Назад
• Вперёд >